UMA LISAN MALEBEIN, LOKALIZADO IHA ALDEIA BIAMARAEN, SUCO HATAZ, SUB DISTRITO ATABAE, DISTRITO BOBONARO.  MALEBEIN MAI HUSI DALEN KEMAK. MALE KATAK SUKAER ENKUANTU BEIN KATAK SANAK. NUNEE  MALEBEIN  KATAK SUKAER SANAK.

TUIR HISTORIA  UMA LISAN MALEBEIN   MAI HUSI AVO MANE IDA NARAN “ASACEUR NIPA KEUR”. AVO NEE HELA IHA  FOHO. FATIN NEBE AVO NEE HELA BA NARAN “ATARA-LIGABAU”. LA IHA HISTORIA NEBE KLEAN KONA BA AVO ASACEUR NIPA KEUR NEE, MAIBE AVO ASACEUR NIPA KEUR HUSIK HELA ERANSA BA NIA GERASAUN SIRA.

ANTONIO MOREIRA HANESAN GERASAUN FOUN NOMOS NUDAR UMA NAIN BA UMA LISAN MALEBEIN HATETEN ERANSA BEIALA ASAKEUR NIPA KEUR NEE MAKA AVO MAUN ALIN NAIN RUA (2), MAUN NARAN MAU-BERE NO ALIN NARAN BERE-BITI. AVO MAUBERE MAKA HARI UMA BOOT NO AVO BERE-BITI HARI UMA KI’IK. AVO MANE MAUBERE HOLA FETO HUSI UMA LISAN OABAN. AVO FETO NARAN BUI-KAU. AVO MANE BERE-BITI HOLA FETO HUSI UMA LISAN DIRU HO NARAN SOI-LAKA. HUSI AVO NAIN HA’AT NEE MAKA HAHU HARI’I UMA LULIK.

ANTONIO HATETEN LORI TEMPO NARUK MAKA GERASAUN UMA LISAN NIAN PREPARA HODI HARI UMA LISAN. TAMBA KONDISAUN UMA LISAN NEBE LADUN DIAK ONA NUNEE IHA TINAN 2011, GERASAUN FOUN UMA LULIK NE,E TUR HAMUTUK HODI HANOIN OINSA ATU BELE HAHU NO HALO PREPARASAUN HODI HARI’I FALI UMA  LULIK NEBE MAK KLEUR ONA AVO SIRA HUSIK HELA. DESDE TINAN NEE KEDAS HAHU HALIBUR MATERIAL KONSTRUSAUN. 

IHA LORON 10 FULAN JULHO TINAN 2013 KOMESA REALIZA HARI’I AIRIN LULIK UMA LULIK 2 NEBE REFERE. IHA LORON 20 SETEMBRO 2013 HAHU SUKU UMA LULIK RUA NEE. UMA LULIK RUA NEBE REFERE MAIS OU MENUS HO NIA AAS METRU NEEN (6) HO NIA LUAN MEDIDA 4X4

TRADISIONALMENTE ESTRUTURA UMA LISAN MALEBEIN NIAN, UMA BOOT NIA FUNSAUN HANESAN  PODER CENTRAL HODI FOTI DESIZAUN NO SIMU RELATORIO HUSI UMA KI’IK. ENKUANTU UMA KI’IK NIA FUNSAUN HANESAN MEDIADOR BA GERASAUN FOUN FETO KA MANE NEBE MAKA ATU TAMA NO SAI HUSI LISAN, HODI HATO’O BA PODER CENTRAL NO LALAOK SELUK NEBE LIGADU HO UMA LISAN NIAN.  

ANTONIO MOREIRA HATETEN AI NEBE UTILIZA HODI HARI UMA LISAN MAIORIA MAI HUSI AI NAAH NO AI SULI. TOTAL AI RIN NEBE UTILIZA HAMUTUK 33 INKLUI AI RIN PRINSIPAL  RUA REPRESENTA AI RIN FETO IHA PARTE LORO MONU NO AI RIN MANE IHA PARTE LOROSAE. UMA LISAN MALEBEIN TAKA HO TALI TAHAN NO DIDIN HUSI BEBAK. UMA NEE IHA ESKADA RUA NEBE SIMBOLIZA ESKADA FETO NO ESKADA MANE. ODAMATAN IHA RUA, MAKA ODAMATAN MANE NO ODAMATA FETO.   HUSI RAI HARI AI  HAMUTUK 46 HODI TANE UMA. IHA MOS AI TUBA LAKA 12, AI RIN KI’IK 6 , DIDIN HO PIKU IHA MOS TOMAR 60, HALAS 27. AI HOTU SEI KESI HO NENA (TALI). AI KABELAK NEBE UZA NAHE BA UMA LARAN HAMUTUK 16. IHA MOS NERE HODI TANE AI LAPEN. AI LAPEN NEE IHA 2 MAKA AI LAPEN LOROSAE NO AI LAPEN LOROMONU. IHA UMA LARAN IHA MOS FATIN HATUUR LALIA NOMOS SESE HODI TAU BATAR WAINHIRA KOLHETA BATAR.

GERASAUN FOUN UMA LISAN MALEBEIN NEE HATUTAN KATAK ALENDE HARE UMA BOOT NO UMA KIIK. IHA MOS UMA KIIK RUA SELUK NEBE PARTENSIA MOS BA LISAN MALEBEIN NIAN MAIBE SEIDAUK KONSTRUI. NUDAR ANTONIO  UMA KI’IK RUA NEE HO NIA FUNSAUN NEBE LA HANESAN HO UMA KI’IK MAUN-ALIN.  UMA KI’IK IDA NARAN UMA KOSAN SIAK, UMA NEE NIA FUNSAUN MAKA ATU FO BENSAUN BA FUNU NAIN SIRA HUSI UMA LISAN NIAN HODI BA HALO FUNU. UMA KI’IK IDA SELUK MAKA HANARAN UMA BEI-MALEBEIN. UMA BEI-MALEBEIN NEE NIA FUNSAUN MAKA HALO TRATAMENTU BA MORAS KA KURA FUNU NAIN SIRA NEBE HETAN KANEK KA MORAS DURANTE FUNU LARAN NO MOS BELE KURA ANIMAL SIRA NEBE MAK HETAN MORAS. MESMU IHA UMA HAAT HO NIA FUNSAUN NEBE DIFRENTE MAIBE UMA HAAT NEE PARTENSIA BA UMA MAUN-ALIN MALEBEIN NIAN MAKA UMA MAUN HANARAN MALEBEIN UMA BOTENG NO UMA ALIN HANARAN MALEBEIN UMA KLAIN. 

REMATA KONSTRUSAUN FOUN, GERASAUN FOUN HUSI UMA LISAN MALEBEIN HAMUTUK HO UMAMANE NO MANE FOUN SIRA KONKORDA NO DESIDI HAMUTUK HODI HALO PREPARASAUN BA INAGURASAUN DURANTE TINAN 1 NIA LARAN. CEREMONIA INAUGURASAUN REALIZA IHA LORON 15 SETEMBRO 2014 HO RITUAL HATAMA SASAN LULIK BA UMA LISAN NIA LARAN. TUIR TRADISAUN UMA LISAN MALEBIAN NIAN, UMA MANE MAK SEI TAMA ULUK NO SASAN NEBE MAK UMANE SIRA LORI MAKA HANESAN, FAHI, FOS, FORE RAI, BOLUS, BISCUIT. UMANE SIRA TAMA SEI SIMU HUSI UMA NAIN LIU HUSI RITUAL IDA TAMA ULUK BA UMA KI’IK NIA LARAN  HAFOIN TAMA BA VISITA UMA BOOT NIA LARAN. ATU TAMA BA UMA KIIK HO UMA BOOT NIA LARAN TENKI HAKRUK TAMA UMA LULIK TAKA HO TALI TAHAN TO’O RAI.  REMATA VISITA UMA MAUN ALIN. UMA NAIN SIRA SEI LORI UMANE SIRA BA IHA FATIN DESKANSA KA IHA  IHA LIAN KEMAK NIAN DEHAN LATA. 

AGOSTO DO REGO NUDAR UMA MANE HATETEN DEPOIS DE LORI SASAN SIRA NEBE UMA MANE SIRA HATAMA SIRA SEI HETAN HIKAS BIBI.

HARI UMA LISAN IDA SEMPRE HASAI MOS DESPEZAS BOOT NEBE TULA BA UMA NAIN, UMANE NO FETOSAN. DESPEZAS HIRAK REFERE SAI KAMAN DURANTE HALO LIA KULTURA NIAN. MAIBE SEI TODAN KUANDU NESESIDADE UMA LARAN NIAN LA KONSEGE SUSTENTA HO DIAK. AGOSTO HATETEN IHA FUTURU HO TEMPO MODERNO AGORA HUSU ATU BELE REDUS SASAN SIRA NEBE UMANE NO FETOSAN SIRA HATAMA NUNEE BELE UTILIZA HODI INVESTE BA EDUCASAUN OAN SIRA NIAN.

AGOSTO DO REGO SENTE KONTENTE BELE HALIBUR MALU HO FAMILIA BOOT NEBE PARTENSIA BA UMA LISAN MALEBEIN NIAN MESMU IHA LIA RUMA NEBE LA HAPAR MALU MOLOK TAMA BA  PROSESU HATAMA SASAN LULIK.

LORON TUIR MAI MAKA FOIN SIMU FETOSAN SIRA. MANHEU KA MANE FOUN SIRA LORI SASAN SIRA NEBE DESIDE TIHA ONA HUSI LIA NAIN LISAN MALEBEIN NIAN MAKA HANESAN  OSAN MUTIN HAT, BIBI, TUA MANAS, SERVEZA KAIXA 1, SPRITE KA BEBIDAS KMAN KAIXA IDA, SIGARU SLOP 2, BUA HO MALUS NO OSAN. PROSESU SIMU FETOSAN NIA LALAOK HANESAN MOS HO PROSESU SIMU UMANE HAFOIN LORI BA FATIN DESKANSA KA LATA.

FRANSISCO FONTES LEITE NUDAR MANE FOUN HATETEN NIA SENTE ORGULHO NO FIAR KATAK UMA LISAN NEBE NIA PARTISIPA BELE HETAN ISIN DIAK. NUDAR FRANSISCO PRESIZA PROMOVE LIA KULTURA NIAN TAMBA BELE HALO GERASAUN SIRA KONHESE MALU NO HAMETIN UNIDADE.

FRANSISCO HATETEN TUIR UZU KUSTUME UMA LISAN MALEBEIN NIAN MANE FOUN SIRA LORO MOS SASAN SIRA NEBE UMA MANE SIRA HATO. MESMU TODAN MAIBE OBRIGADO TENKI KUMPRI.

FRANSISCO HATUTAN MESMO PROMOVE TRADISAUN UMA LISAN NIAN  NEBE IHA MAIBE PRESIZA MOS REDUS SASAN SIRA NEBE TULA BA MANE FOUN SIRA ATU LORI.

ROSITA GUIHERMINA NUDAR OAN FETO IHA UMA LISAN MALEBEIN HATETEN NIA PARTE SENTE KONTENTE TAMBA HO LIA FETOSAN NO UMANE BELE HALO GERASAUN UMA LISAN NIAN KONHESE MALU.

REMATA SIMU UMANE NO FETOSAN LORON TUIR MAI, UMA NAIN, UMANE NO FETOSAN SIRA KOMESA BA ONA FATIN NEBE ULUK BEIALA SIRA DESIDE HELA ATU BELE TESI AU (ODAN). PROSESU NEE HANARAN TA ESA.  TA ESA  SEI LIU HUSI PROSESU NOMOS RITUAL LUBUK IDA. OHO BIBI 1 HODI HALO SERIMONIA RITUAL IHA FATIN NEBE BEIALA SIRA HATUDU HELA. SERIMONIA HOTU MAK BELE SELECIONA AU KA ODAN NEBE MAK ATU TA.

HAFOIN TA TIA ODAN,LIA NAIN SIRA SEI TARA SASAN MEAN HANESAN BELAK HO MORTEN NEBE PREPARA ONA.I DEPOIS UMAMANE HO MANE FOUN SIRA NEBE MAK HOLA PARTE IHA SERIMONIA  RITUAL NE SEI SIMU BUAH MALUS NEBE PREPARA IHA IHA FATIN REFERE,DEPOIS MAK SEI HALO PROSESAUN HUSI FATIN REFERE HO KNANUK KSOLOK CULTURA NIAN   TO’O IHA UMA LISAN MALEBEIN. AU KA ODAN NEBE TO’O ONA SEI HARI’I IHA FATUK LEOKIKI NIA LETEN SEI TAU HAMUTUK HO SASAN NEBE LULIK HANESAN: ODAN,      SURIK,DIMAN        NO BETUN NO KOAK.

DESKANSA MINUTU BALUN NIA LARAN  KONTINUA KEDAS HO PROSESU LOOK BUA MALUS. NEE PROSESU IDA NEBE KLEUR LIU BELE HALO DURANTE LORON IDA KALAN IDA KUANDU IHA LIA NAKSALAK MALU. TUIR FALI     IDA NE’E LIA NAIN SIRA SEI HALO TAN SERIMONIA RITUAL HAMUTUK HO UMA MANE MANE FOUN HODI HALULIK ODAN NO SASAN LULIK SELUK DURANTE KALAN IDA, MOLOK LORI TAMA BA IHA UMA LULIK LARAN.

DEPOIS DE HALULIK TIHA ODAN NE’E, LIA NAIN SEI BOLU UMA MANE NO MANE FOUN SIRA IDA-IDAK  HODI SIMU SIRA NIA BUAH NO MALUS LULIK HUSI LIA NAIN. ESA KA ODAN NEBE HO SANAK HITU(7)MAK SEI SAI HANESAN PONTE ENTRE GERASAUN NEBE HAMAHAN AN IHA UMA LISAN MALEBEIN  HO      AMAN MAROMAK.

ANTES HATAMA SASAN LULIK BA UMA LISAN LARAN SEI HALAO MOS RITUAL BALUN IHA FATUK LEO KIKI. IHA FATUK LEO KIKI NEE HARI MOS AI TOS. SASAN LULIK SIRA NEBE LISAN MALEBEIN UZA HANESAN SASAN SAKRAL MAKA:

-           ESA KA ODAN (AU LULIK NEBE FOTI HUSI KNUA ANTIGO BEIALA SIRA NIAN)

-          SURIK NO DIMAN, HANESAN MEIK NO KROAT HODI DEFENDE AN NOMOS HASORU INIMIGO

-          FATUK LALIAN, HODI FO MANAS BA GERASAUN NEBE HAMAHAN IHA UMA LISAN MALEBEIN

-          BETUN KOAK , UZA HODI TAU FOS NEBE SEI KARI BA EMA KA BALADA SIRA PARTENSIA BA UMA LISAN NIAN NEBE MORAS ATU HETAN DIAK FILA FALI.

PROSESU TUIR MAI MAKA HATAMA SASAN LULIK. MOLOK HATAMA SASAN LULIK SEI OHO TAN FAHI RUA HODI HARE URAT MOLOK HATAMA SASAN LULIK. SASAN LULIK SEI  HATAMA DEIT WAINHIRA LORON MATAN SAE.  REMATA HATAMA SASAN LULIK HAHU OHO ONA NAN HODI FAHE BA FETOSAN NO UMA MANE SIRA.

IHA MOS RITUAL SELUK MOLOK FAHE MALU MAKA HIKIS FAHI RAN BA ODAMATAN UMA LISAN MALEBEIN KIIK NO BOOT HODI LOKE DALAN BA OAN FETON SIRA NEBE HAFOLIN ONA ATU SIRA MOS BELE TAMA KA VISITA IHA UMA LISAN LARAN. REMATA TIHA HATAMA SASAN LULIK BA UMA LISAN LARAN. FAHE NAAN BA MANHEU KA FETOSAN SIRA.

FAMILIA GERASAUN UMA LISAN MALEBEIN NIAN SEI HEIN HODI SIMU BUA NO MALUS NUDAR MATAK MALIRIN HUSI LISAN NIAN HANESAN ROHAN HUSI CEREMONIA INAUGURASAUN UMA LISAN MALEBEIN MOLOK FILA BA IDA-IDAK NIA TOOS KA SERVISU FATIN HODI KONTINUA HATUTAN MORIS.

Fontes ba Historia

SR.ABRAO DOS SANTOS

SR.ANTONIO  MOREIRA

SR. FERNANDO GUILHERME

SR.GUILHRMINO DOS SANTOS

SR.AMANDIO BORGES